Le Festival dla jonëza dl’Euregio 2022

Ivan Anvidalfarëi dla terza ITE á tut pert dai 21 ai 24 de setëmber al’önejima ediziun dl festival dla jonëza dl’Euregio. Tla cité dl Trentin é rová adalerch studënc y studëntes di trëi raiuns dl’Euregio (Tirol, Südtirol y Trentin) por imparé da se conësce y se dé jö cun le tema: tradiziun y inovaziun. Conscidran y colian i ciamps dl’economia, dl’ert y dla leteratöra, ái albü la poscibilité da aprijé damí le significat de chëstes döes parores.

La manifestaziun á metü man avisa le De internazional dla pesc, insciö ái vijité naota la gran ciampana di tomá te vera, y dedô ési stá a ti ciaré ales inovaziuns tecnologiches pitades dal Polo Meccatronica y dal Proiet Manifattura de Rorëi.

Tl „Polo Meccatronica“, ti él gnü presenté n valgönes aziëndes inovatives dl’Euregio, sciöche la startup, Alpmine de Südtirol, che laora cun na energia inteliënta.
Ai á vijité le „Progetto manufattura“, na aziënda olache al gnô plüdadî fat zigari a man y aldedaincö él n post, olache les startup pó fá i pröms vari. Le tët de chësc edifize é le plü vërt dla Talia. 

Tl program êl preodü la vijita al MART y dailó êl gnü organisé de vigni sort d’ativités. Da sëra ési jüs a ciaré les stëres dal osservatore astronomich, mo baldi êl massa da neo y ai ne á nia odü les stëres. Ala fin se á i jogn y les jones saludé dala Ciampana dla Pesc. A Ivan ti ál salpü dër bel y al ti aconsiëia a düc y a dötes che á la poscibilité, da tó pert a chësta manifestaziun en ater ann. Al é gnü acompagné tratan i dis de festival dla jonëza da Magdalena Lerchegger dl referat plurilinguism y didatica dl Ciamp Pedagogich.