La dezijiun

Fá n ann de scora foradecá ne é nia na dezijiun da tó ala lisiera. Al ó ester tröpa ressolutëza y motivaziun por soporté dötes les dificoltés y problematiches che an incuntará tratan l'esperiënza. Iö á tut chësta dezijiun prësc n ann denant co i foss pié ia. La rajun prinzipala che me á porté a tó chësta dezijiun é mi obietif por le dagní. Teco, chësta esperiënza me ess nia ma pormetü da imparé le inglesc sciöche al toca, mo me ess ince fat madorí sciöche porsona.

Pié ia

Do tröc mëisc de preparaziun éra finalmënter tan inant. I á saludé düc mi compagns y spo sunsi ai 6 de Agost pié ia cuntra Milan cun mi geniturs. Le de do, ái saludé mi geniturs y sun pié ia cuntra New York. A New York êl indere burt tëmp y insciö sunse arsis a Chicago. A Chicago unse messü dormí te aeroport y le de do sunse finalmënter rová a New York, olache i sun sté 3 dis denant co rové tl Michigan.

Le mëteman

 Les prömes edemes é passades dër debota. Al mëteman ne él nia sté saurí da se ausé ite al lingaz nü, ince porciodí che le lingaz baié é atramënter co le lingaz imparé te scora. N iade che i me á ausé ite al lingaz, él deventé döt plü saurí. Vigni de conesciôi porsones nöies y do n pü’ de tëmp âi bele val' compagn. Canche i sun rové te mia familia nöia ái messé mëte man da ester plü independënt. I messâ cujiné, lavé jö, me lavé instës le guant y le soperscé. Se ausé ite al mangé american ne é gnanca sté dër saurí. I americans mangia dër tröpa cern y patüc gras y gonot malsann. Le plü di iadi vëgnel cumpré ite mangé dlacé ite, che vëgn metü te microvele n per de menüc y spo mangé. Ai 20 de agost ál metü man la scora. La scora americana é dër atramënter co la scora taliana, por ejëmpl él vigni professur che á süa classa y i scolars müda classa do vigni leziun. La metoda de insegnamënt é tröp plü moderna y efiziënta co chëra taliana. An laora madër cun le computer y döt le material vëgn ciarié sön Google Classroom. Al ne vëgn mai scrit sön papier o partí fora material sön plates de papier. I scolars ne vëgn nia metüs tan sot a druch sciöche tla Talia y al vëgn dé tröp plü importanza al sport. Tratan l'altonn ái iö soghé al palé tla scuadra dla scora. Le sport vëgn tut tröp plü sceriamënter y i ritms é tröp plü alc. An se alenëia vigni de do scora por n’ora y mesa o döes ores.

L’invern

Do che la sajun de palé ê rovada, âi te n colp tröp plü tëmp lëde. Gran pert de chësc tëmp ái passé te familia cun mia "uma" Catherine y mi "fre" Daniel. Le pere de Daniel, Steve, y le fre de Daniel, Sam, viô te na cité (Lansing, MI) dlungia, mo ai gnô gonot a se ciafé. Daniel y Sam á ciamó n fre, Elijah, che vir tl Vermont, che é n ater stat di Stac Unis. Por les vacanzes da Nadé y Nanü sunse jüs düc adöm a le ciafé y i un passé les vacanzes cun ël y süa fomena Ana, che vëgn dal'Argentina. Dailó sunse ince jüs coi schi, mo i crëps americans ne é bëgn dër da nia. Tratan l'invern ái ince albü la poscibilité da jí cun n mi compagn a vijité Chicago. Chicago é na cité dër grana, y do mia minunga él öna dles cités plü beles de döt le monn. Tratan l'invern unse ince albü le bal dla scora. Chësc é n pü' sciöche le bal de maturité por nos. I ëi mëss invié n'ëra al bal y chësc vëgn fat cun n gran placat y n poch de ciüfs. La sëra dl bal él spo da jí fora a cëna y plü tert al bal. Do le bal se incunton spo cun d’atri compagns y festejëia inant.

L’aisciöda

D'aisciöda finalmënter él gnü plü bun cialt y an podô indô fá sport y ativités defora. Por nos ê chësc ciamó plü de gran importanza, deache nosta ciasa é dan n lech, porchël podôn indô jí te lech cun la barca a pié pësc o cun le "Jetski" a se fá na hez. Iö aspetâ dër ert al'aisciöda, ince deache tratan les vacanzes de Pasca essi podü jí a Las Vegas y tl Grand Canyon cun la familia de n mi compagn. Chësc ess messü ester la plü bela pert de mia esperiënza. Baldi él cun le scomenciamënt dl’aisciöda ince gnü adalerch le Coronavirus, che á roviné döt. Le iade a Las Vegas é gnü desdit y püch tëmp dedô ál scomencé la carantena. Por n per de edemes sunsi sté saré ite te ciasa cina che i á ai 23 de merz ciafé la burta notizia : al é da jí a ciasa.

Le iade zoruch

Le governadú dl Michigan á lascé al savëi che les scores foss restades stlütes cina al scomenciamënt dl proscimo ann de scora, porchël él gnü tut la dezijiun che düc i "Exchange Students", o studënc foresć, ess messü jí zoruch a ciasa. Cun la ria löna ái te püc dis messü fá i cufri y saludé düc. A gauja dla carantena ne ái nia podü saludé gran pert de mi compagns. Do che le jore é gnü plü iadi sposté y straiché, ái ai 3 de aurí spo lascé l'America. Do 3 jori y plü de 30 ores de iade sunsi finalmënter arsí a Milano Malpensa. L'aeroport ê öt, madër mi pere á podü gní a me tó. Por döes edemes ái spo messü sté daite zënza odëi degügn compagns.

Conclujiun

Sce i pënsi do a chësta esperiënza y mëti a confrunt la porsona che i ê dan pié ia cun chëra che i sun sëgn, spo vëighi dër na gran chersciüda personala. Chësta esperiënza me á fat madorí dër tröp da plü punc de odüda y me á fat deventé tröp plü autonom. Al é sté n'esperiënza unica, che á mudé mia vita. I á sëgn na secunda ciasa dal'atra pert dl monn cun na familia che sará tres desponibla da me ospité. Chësta esperiënza me á dé la poscibilité de odëi le monn. I á podü odëi n'atra cultura y na manira da ponsé desfarënta. Por mi dagní sará chësta esperiënza de gran aiüt. Al é n ater vare cuntra i traverc che i ó arjunje tl dagní.