Mobilité sostinibla
L’assessur Daniel Alfreider incunta jogn y jones dles Scores Altes da La Ila
Tl cheder di proiec scolastics che toma ite tla Educaziun zivica, á les Scores Altes La Ila - en colaboraziun cun l’Intendënza ladina - metü a jí na incuntada cun l’assessur Daniel Alfreider, referënt provinzial por la Mobilité y les Infrastrotöres.
L’assessur á naota presenté l’ativité de so assessorat, mostran tl concret i intervënc che injiniers, tecnics y laoranti é cherdá da fá en cunt de manutenziun de strades, punc y tuní de competënza provinziala, y spo él ruvé ite tl nojel dla chestiun por chëra che al ê gnü cherdé adalerch, tan co chëra dla mobilité sostinibla, spligan dantadüt ci che “sostinibl” ó dí.
Ci che Alfreider á orü ti mëte a cör, a studënc y studëntes, é che la mobilité é n conzet global, bindebó comples mo afascinant, y al nes reverda düc canc, a pié ia da nosc stil de vita.