Scomenciamënt ann de scora 2015/2016

Ai 06 de setëmber á metü man l’ann de scora 2015/2016. Do na funziun religiosa te dlijia se á la comunité dles scores altes da La Ila incunté tl’entrada dla scora por scomencé adöm n tru nü. La direturia Elena Pellegrini á tut ite les studëntes y i studënc, á saludé döt le personal y ti á aodé n bun ann de scora a dötes y a düc. Te so discurs á la direturia alzé fora la gran valüta dla formaziun tl monn d'al dé daincö y racomané ales studëntes y ai studënc da se porvé dassënn por podëi costruí dé por dé la fondamënta por le suzes tl monn dl laur y dl stüde universitar. Ales insegnantes y ai insegnanc ti á la direturia metü a cör da acompagné les jones y i jogn te so tru formatif, da ti sté dlungia tles dificoltês y da ti dé para la vëia y les capazitês por ester bunes/bugn da se ciafé ite te na sozieté olache le savëi y la formaziun ciafa tres na maiù importanza.