Esperimënt sozial: Ciügn é pa i valurs plü importanc di jogn d’aldedaincö?

Nos studëntes y studënc dla 4 classa dl Istitut tecnich economich, Lizeum linguistich y dles sciënzes umanes da La Ila un fat na inrescida sön i prinzips y i valurs di studënc de nosta scora. Un partí fora te vigni classa n chestionar olache i studënc podô vignun mët do ordin numerich i valurs che é por ëi plü importanc. En döt podôi chirí fora danter 13 valurs, sciöche „Nia se droghe“ y „Nia jí trac cun l‘auto“ y danter chisc êl ince n per de comandamënc cristians. Un coiü adöm 122 chestionars sön 130 scolars, spo unse fat fora de chisc na statistica.
L’idea de chësc proiet é nasciüda do che nosta professuria de religiun nes á mostré n’atra inrescida publicada tl foliet „Sole 24 ore“ ai 11 de otober 1994. Ara se tratâ dla medema inrescida che nos un fat, che se basâ dandadöt sön i 10 comandamënc cristians. Ince sce les döes generaziuns é dër atramënter, unse odü che ares i dá trames tröpa importanza al comandamënt „Nia copé“. Nia tröpa importanza ti él gnü dé a prinzips sciöche „Nia lasce fora la scora“ o „Nia blastemé“. En plü á i scolars podü ajunté n prinzip por ëi significatif, sciöche por ejëmpl „Respeté les ëres y i tiers“, „Tó precauziuns“ y „Se orëi bun a se instësc“.
Al se á salpü dër interessant da fá chësta inrescida por odëi ciügn che é i valurs dla vita de nüsc compagns de scora.