Lisa davagna les Olimpiades de Talian
Scora - Ai 3 de merz él gnü desfiré tla scora profescionala de grafica y comunicaziun da Porsenú les finales provinziales por les ”Olimpiades de Talian”. Chësc concurs nazional é rové iniann a süa 6. ediziun y vëgn organisé dal Minister dl’Istruziun, Université y Inrescida (MIUR), en colaboraziun cun la Societá Dante Alighieri, che fistidiëia dla promoziun dl lingaz talian tl monn. Al ne tol nia ma pert scores dla Talia, mo ince les scores talianes fora por le monn. Da trëi agn incá pó fá para - te na seziun a pert - ince les scores dla provinzia de Balsan, olache i studënc á le talian sciöche secundo lingaz. Pro chëstes toca ince les scores ladines, che á arjunt vigni iade dër de bugn resultac, sc’i ponsun ai 2. posć arjunc tles ultimes döes ediziuns respetivamënter da Elena Frenademez y Silvia Pizzinini. Ëres â porchël podü jí n’edema a Rimini por na formaziun intensiva de talian. Iniann éra jüda ciamó damí, olache le pröm post tla categoria junior (1. y 2. scora alta) é gnü davagné da Lisa Verginer da San Martin, 15 agn, studënta de pröma classa dl Lizeum Linguistich da La Ila. Tles finales s’á mosoré indöt 61 studëntes y studënc dl bienn y trienn de scores altes y scores profescionales. Chisc â da respogne a indöt 30 cuesic incër le lingaz y la cultura talians. 
Tles scores altes da La Ila él le professur Carlo Suani che fistidiëia da porté inant y motivé la partezipaziun a chësc concurs. Por ël é la partezipaziun di studënc na ocajiun importanta: ”Al é dër important che i studënc pois tó pert, deache ai á la ocajiun da fá na esperiënza nöia y ince da podëi se mosoré cun d’atri studënc de Südtirol.” Por ci che reverda le concurs te nosta provinzia, á iniann tut pert 27 scores cun incër 800 studëntes y studënc. A Lisa Verginer i éra garatada polito da desfiré le concurs, arjunjon insciö le pröm post tla categoria junior. Na devënta che ne ti á nia ma porté n pest material, mo ti pormetará suradöt da jí dai 17 ai 19 de merz ales finales dles Olimpiades de Talian. Chëstes gnô dagnora tignides a Firenze - cité cöna dl lingaz - mo é iniann gnüdes spostades ezezionalmënter a Roma.
Por le professur Carlo Suani na ocajiun unica: ”Lisa podará fá na gran esperiënza y odëi davijin y posć dla cultura y dles istituziuns talianes. Al sará le minister competënt che tol ite i finalisć, i studënc podará jí a ti ciaré ai ministers y odëi i zëntri dla cultura y dla politica.” (pablo)