PROIET TEATRAL 2015 “WAR IS HELL”

En ocajiun dl centenar dla Pröma Vera Mondiala, à la Repartiziun dla Cultura y Intendenza ladina metü a jì deplü proiec teatrai sön la tematica de conflic y vera tles scores mesanes y altes dla Val Badia y de Gherdëna. I proiec é gnüs coordinà da Eveline Vinatzer y laurà fora te na manira teatrala dai scolars cun l'aiüt dla pedagogista teatrala Erika Castlunger.

I studënc y les studëntes dla pröma y dla secunda tlassa dl lizeum linguistich y dles sciënzes umanes da La Ila à tut pert cun gran interes y entusiasm a chësc proiet, lauran fora, ince cun l'aiüt di insegnanc de lingac, n toch teatral dal titul “War is Hell” (“La vera é l'infêr”), che ai á porté sön paladina tla Ciasa dla Cultura da La Ila ai 25 de merz y ciamó n secundo iade ai 15 de má 2015. Tl proiet él gnü trat ite düc i lingac che vëgn imparà te scora: ladin, talian, todësch, ingleje, franzeje y latin.

Danfora s'á i studënc y les studëntes dé jö te deplü materies cun l'argumënt dla vera. Al é gnü lit libri y poesies de auturs conesciüs che á vit y scrit tl tëmp dla vera, lëtres y diars di soldas dla Ladinia scric dpanter le 1915 y le 1918, al é gnü ascuté cianties, ciaré films y baié sura i conflic te sü aspec plü desvalis.

Por nosta generaziun che ne à por fortüna nia vit la vera, ne n'él dessigü nia stè saurì da afrontè chësta tematica, da porvé da se imedejimé te situaziuns tan düres, da sintí la crudelté liada ala vera y da porté düc chisc sentimënc sön paladina, cun l'aiüt dl lingaz dl corp. Tres le proiet á i scolars y les scolares podü jì n pü' plü sot tles dinamiches di conflic y capì y renforzé l'importanza di valurs dla convivënza y dla pesc.

Do avëi laurè sö tröp material él spo gnü metü adöm deplü scenes por rapresentè situaziuns desvalies che vëgn a se cherié tratan la vera, sciöche pur ejëmpl le mëssëi jì demez da ciasa, le incherscimun, le öt y la distruziun che les veres lascia dagnëra sön tru.

Afronté n argumënt te na manira interdisciplinara y interativa ti porta dër tröp ai studënc y ales studëntes. Ai/ares ne se arichësc nia ma de conoscënzes sura les tematiches tratades, mo svilupëia ince tröpes competënzes: ai/ares impara da adurè le lingaz dl corp por trasmëte emoziuns, da aduré damí la usc y ti dé la dërta intonaziun ales parores, mo ince da tignì sot a control les emoziuns y se mostrè dan da n publich. Dër de valüta é ince l'esperiënza dl lauré adüm: odëi che vignun pó dé n contribut, che vignun é important y che sce düc laora adüm pur le medemo fin, pól veramënter garaté val' de bel.