Scora y turism laora adöm
Scora/1 - Do le gran suzes dl proiet ”Turism - n ram economich sterch cun poscibilités de laur”, sté l’ann passé tl ITE da La Ila, á la direziun dla scora, deboriada cun la Uniun di Ostis HGV tut la dezijiun da le porté inant ince iniann. Le proiet s’oj ala cuinta classa y vëiga danfora deplü intervënc da pert di esponënc dl setur turistich, sciöche ostis, implantisć y esperc dla Uniun di Ostis. Chisc ti portará dant ai studënc sües esperiënzes y conescënzes ti rams desvalis, cherian insciö n liam danter le stüde y la realté economich-turistica locala. ”I sun contënta che ara nes gareta da trasmëte deboriada contegnüs y fac importanc sön le turism tla Val Badia”, á dit la surastanta dl HGV Val Badia Marina Crazzolara pro la presentaziun dl pröm modul, alzan fora la funziun importanta dla hotelaria sön le marcé dl laur. Chësc setur á mostré sö tl ultim ann vigni mëis na chersciüda de porsones impliades. ”Porchël pó le turism cun rajun gní odü sciöche le motor dl’economia”, á dit Crazzolara.
Le diretur dl Consorz Turistich Alta Badia Roberto Huber á porté dant informaziuns interessantes sön le consorz y süa organisaziun, deperpo che Andy Varallo é jü ite sön le gran laur che stá do l’organisaziun de de gragn evënc sciöche la Copa dl Monn de schi. L’ostí Michîl Costa ti á indere presenté ai studënc süa filosofia de manajamënt de so hotel y dl personal. Ince la direturia Elena Pellegrini y la coordinadëssa prof. Elisabeth Frenner á mostré ligrëza por chësc proiet, alzan fora la colaboraziun garatada danter scora, uniun di ostis y economia.
Le proiet ê pié ia le pröm iade de novëmber 2014 y s’â porté inant cina d’aurí 2015, por indöt 15 modui de döes ores. Tl ann de scora 2015/16 vëgnel desfiré anter 7 modui, da jená cina aurí/má. Metü man án cun i portai de prenotaziun online, por passé a na introduziun generala sön le turism y ai contrac de laur tla hotelaria. Ara jará inant cun modui sön le program Asa- Hotel, sön co se presenté sigüsc söl laur, mo ince sön la comunicaziun y retorica. An stlujará jö cun na manifestaziun de evaluaziun y contlujiun dl proiet.
Por la professuria Elisabeth Frenner, che acompagnëia i studënc, rapresentëia chësc proiet na esperiënza de valüta, suradöt ince sciöche liam cun l’economia locala: ”Nosta scora é n istitut tecnich economich cun spezialisaziun de aministraziun, finanza y marketing, olache i studënc ciafa na formaziun sön la macroeconomia nazionala y internazionala, legislaziun zivilistica y fiscala, ai impara contabilité, organisaziun aziendala, conzec de finanza. Ara se trata de stüdi che büta por vigni setur de laur, mo deache le setur economich prinzipal de nosc raiun é le turism, él important che ai ciafes ince n pü’ de formaziun tecnica y aministrativa spezifica te chësc ciamp, ince por ti pité spo poscibilités da lauré tl turism.” (pablo)
Tut dal articul dla Usc di Ladins de Pablo Palfrader