Scores altes da La Ila y AIDO

Nosta scora é gnüda inviada al "2° Meeting Internazionale AIDO - Una, tante vite in attesa" a Maran por presenté le resultat de nosc proiet.

Ai 2 de aurí éra stada tan inant. Nosta scora é gnüda inviada al “2° Meeting Internazionale AIDO (Associazione Italiana Donatori Organi) - Una, tante vite in attesa” a Maran por presenté le resultat de nosc proiet.

Le proiet á metü man de dezëmber 2015, do che la presidënta dl AIDO da Balsan, Annamaria Saviolo, é gnüda a scora a ti cunté ales studëntes y ai studënc dla V lizeum y dla V ITE dla donaziun di organs. En chësta ocajiun unse ince ascuté la testimonianza de döes porsones dla Val Badia che á albü esperiënza direta cun le tema. L’incuntada se á stlüt jö cun la proposta da pert de Aido de fá valch adöm sura le tema dla donaziun de n organ, che i un tut sö dër ion.

Le gran laur é sté le mëteman, ci urunse pa fá?, Co le fajunse pa?, mo canche l’idea é stada concretisada dailó éra atira jüda inant.

S’un ponsé da fá dui video:

les studëntes dla V lizeum á realisé n reportage/inrescida olache ëres á fat n valgünes intervistes söl tema AIDO; les studëntes y i studënc dla V ITE á fat na sort de “spot pubblicitario” che porta a fá ponsé do le spetadú sura le tema dla donaziun di organs.

Döt le laur é gnü realisé cun le contribut de AIDO.

I toli l’ocajiun por rengrazié nosta direturia Elena Pellegrini che á atira sostigní chësc proiet, les studëntes y i studënc che á tut pert, Paolo Vinati che se á daidé realisé i dui films y Jennifer Comploi, Ouerghi Ismahan, Nadine Pescoller y Silvia Costabiei che è gnüdes a Maran a presenté le laur, giulan a düc.

P.T.