THE SLEEPLESS ONES

 Bele da deplü agn se dà jö i scolars dles scores altes da La Ila cun le teater. In mertesc, ai 12.04., á la prüma y la secunda classa dl Lizeum Linguistich y dl Lizeum dles Sciënzes Umanes da La Ila porté sön paladina le toch teatral „The sleepless ones“, traslaté: chi che ne é nia bugn da dormí.
Ince in chësc ann àn bele metü man adora da se dé jö cun la tematica: da d’altonn él gnü fat les prömes incuntades danter Erika Castlunger, coordinadëssa dl  proiet, y i professurs dla scora alta. Defata dedô á i scolari y  les scolares fat de piceres improvisaziuns, da chëres che al é nasciü i personaji, la storia y i dialoghs por le teater. Erika Castlunger á cují adöm dötes les situaziuns y les á sotrissé cun de bela musiga.
Por ciodí ne é pa les porsones nia bunes da dormí? Al po ester por banalitês, sciöche na piza che stá söle magun o por gauja dl iat che miaura döta nöt; d’atra pert n’ésun po ester nia bugn da dormí por via che an ne soporta nia le chît, che an se tëm, che an á pordü le laur, che an á zënza val’fistide.
Le toch é dër garatè, á lascé odëi tröpes situaziuns de vita, in pert ligherzines y in pert da ponsé sura.

Comentar de Erika Castlunger
Fá teater cun les studëntes y i studënc dla pröma y dla secunda classa dl Lizeum Lingustich y dl Lizeum dles Sciënzes Umanes é sté oor me indo n gran plajëi. Bele dales prömes incuntades che i un albü âi podü osservé l’entusiasm y la vëia dles studëntes y di studënc de porvé fora teatralmënter de plü situaziuns che ess podü jí bun por la rapresetanziun. La tematica ê chëra de ne ester nia bogn da durmí y i un dediché tröp tëmp a chirí y a ponsé ci sort de personaji y de situaziuns che i essun podü porté sön paladina. Le bel de chësc laur, é che les studëntes y i studënc á porté ite n gröm de sües idees, al é sté n’ocajiun por sughé cun se instësc purvan fora personaji particolars. Le bel y tl medemo tëmp dër rî y sfadius de lauré fora instësc scenes, é che an mëss fá laoré dër tröp la fantasia.  Y por me él tres na gran sodesfaziun, canche i vëighi sciöche i studënc laôra, cun ci emoziun che ai vá sön paladina y dantadöt canche i vëighi sciöche ai vëgn fora de süa scüscia y se lascia odëi y aldí. Fá teater te scora ne ó nia dí cherié aturs profescionisć, mo le teater te scora é important por imparé da comuniché, por fá crësce la crëta te se instësc y tl grup, y al é n’ocajiun unica por se conësce te n’atra manira.