NATALE - NON DISPONIBILE/AUSVERKAUFT

Al é oramai tradiziun che les scores altes da La Ila se dá jö cun n proiet teatral tratan l'ann de scora. In chësc iade él gnü ponsé de le porté sön paladina in ocajiun dla festa da Nadé.

Bele de setëmber s'á n grup de insegnantes incunté cun la regista Erika Castlunger por chirì idees sura la tematica dl Nadé. Chëstes idees é spo gnüdes laorades fora tla secunda classa dl Lizeum a La Ila, che á spo do Gnissant podü mët man cun les proes te scora y spo ince sön paladina.
Tl stil di ultimi agn é ince chësc toch teatral metü adöm da deplü scenes, liades adöm tres cianties. Les tematiches é stades dër desvalies: n iade vëgnel cunté de Nadé plü dadî, n ater iade él "Santa Claus" che se strita cun le Pice Bambin y spo vëgnel ince imaginé le Nadé tl 2500. Sambëgn n'á gnanca podü mancé le confrunt danter le Nadé sciöche festa comerziala y le Nadé plü sintí y che se dá jö cun l'umanité.
Le teater é gnü porté dant dui iadi: la jöbia, ai 22.12 da sëra por geniturs y parënc y le vëndres, ai 23.12 por la comunité dla scora. Le teater á dër plajü, sciöche ince le momënt da ste adöm pro val'duciaria do les rapresentaziuns.
N gran giulan ti va ai jobleri y ales jobleres, ala regista Erika Castlunger y al grup de insegnanc y insegnantes che á metü a disposiziun tëmp y savëi por le bun garaté dl proiet.