Amir Boucetta ala finala nazionala dles Olimpiadi de talian.

ala finala nazionala dles Olimpiadi de talian a Firenze, metüda a jì dal Minister dla Istruziun Publica y dl’Université....

Ël s’à mirité chësta partezipaziun, davagnan, ai 14 de merz, les proes finales provinziales de Porsenù, dedicades ai studënc y ales studëntes dles scores altes todësces y ladines dla provinzia da Balsan. A chësta otava ediziun dles Olimpiades à tut pert 1.154 scores, sides talianes che forestes, por n total de 60.300 studënc. I finalisć ruvà a Firenze é sta 84, cun 4 studënc ruvà da foradecà (Francia, Turchia, Marocco y Grecia).

Te süa categoria (senior) é Amir, studënt da San Ciascian, ruvé al 24° post.

A Firenze ne à i 84 finalisć nia ma afronté la gara. Al ti é gnü metü a desposiziun n rich program de referac söl lingaz talian, n pert tignîs tla Villa Medici a Castello, sënta dla “Academia della crusca”, l’istituziun che plü dles atres se dà jö cun l’ lingaz talian. Y do la gara é düc i studënc y les studëntes gnüs menà a vijité i majeri monumënc dla cité.

Da cin’ agn incà vëgn chësta gara tignida ince tl Lizeum linguistich y dles sciënzes umanes da La Ila, olache la professera de talian Zingerle Raffaella à arjigné ca Amir y sü cumpagns de classa cun deplü simulaziuns y proes di agn passà. Ales finales de Porsenù s’à la studënta de cuarta Silvia Pizzinini tlassifiché al secundo post, davagnan insciö na sojornanza de trëi dis a Firenze, adüm a n curs de talian.

Söl retrat : Carlo Suani (acompagnadù), Amir Boucetta, Nina Franceschi y Cristina Corbetta (coordinadëssa provinziala dles Olimpiadi de talian)