Educaziun ala sanité: referac informatifs sura dependënzes y alimentaziun sana
L‘edema danter le pröm y le secundo semester é por les scores altes n‘edema n püch particolara. Tres cursc de sostëgn ti vëgnel dé la poscibilité ai studënc y ales studëntes da trá sö les materies negatives, al vëgn organisé de vigni sort de cursc de sostëgn, mo ince d‘atri proiec. Al vëgn tresfora ince dé gran pëis al‘educaziun ala sanité, adoron pö n corp sann, da ti dé alberch a na mënt sana.
I studënc y les studëntes á tut pert a referac dl dotur Alfio De Sandre, diretur dl Departimënt dependënzes dl‘Ulss da Belun y primar dl‘alcologia che á baié deboriada cun süa colega sura les dependënzes suradöt dal alcol y dal jüch. Al á splighé i efec tragics che chëstes dependënzes pó avëi sön les vitimes.
Le dotur Lucio Lucchin, diretur dla Unité operativa de dietetica y nudriziun tl ospedal de Balsan á baié sura l‘importanza de n‘alimentaziun sana y al á metü man süa relaziun spligan la dieta mediteranea, che é gnüda reconesciüda sciöche patrimone dl UNESCO tl 2010.