Iade d'istruziun lié al proiet "La streda per l'Europa - Percorso europeo - Der Weg nach Europa"

Nos dles cuartes classes dl Istitut Tecnich Economich y dl Lizeum Linguistich da La Ila un albü sëgn de ma la poscibilité da vijité adöm a na classa dla WFO da Bornech trëi cités europeiches te cinch dis.

Chësc iade d‘istruziun é lié a n proiet sura l‘Europa Unida, che é jü inant fora por gran pert dl ann de scora. La classa dla scora da Bornech é n iade gnüda ite a La Ila. Tratan chësta incuntada unse imparé da se conësce y dedô se unse metü adöm te grups moscedá al fin de fá inrescides sura tematiches desvalies che reverda l‘Uniun Europeica. De merz él spo sté la secunda incuntada a Bornech.

Ai 07 de ma êra spo tan inant. Adora da doman sunse piá ia cun le bus cuntra Frankfurt, la pröma tapa dl iade. Ciamó en chë sëra unse podü jí sön la Main Tower a ciaré al florí dl sorëdl. Al se é garaté n gromun de fotografies, che nes daidará recordé le bel spetacul dla natöra passé en compagnia. Le de do danmisdé unse ciaré ala Banca Zentrala Europea y dedô sunse piá ia cunta Brüssel. La cité é posizionada tl zënter dl‘Europa, la varieté linguistica, y ince le bun coliamënt dl trafich te dötes les direziuns á porté pro che la capitala dl Belgio se svilupass tl zënter aministratif dl‘Uniun Europeica.

I sun jüs a ti ciaré al museum dla storia d‘Europa y un fat na roda acompagnada fora por cité.Implü sunse jüs a ciaré al sëgn carateristich dla cité: l‘Atomium. Le molecül de fer che é ingrandí n valgügn miliarg de otes é gnü fat sö en gaujiun dla esposiziun mondiala dl 1958, y al vel da dailó incá sciöche atraziun y simbol dl progres y dla pesc nucleara. Tl museum dla zuculada él ince sté la poscibilité da fá na degustaziun, y do na roda te cité sunse en bela compagnia indô piá ia dl vers de Strasbourg tla Francia. Strasbourg é na beliscima cité söl confin danter la Francia y la Germania. Al ti vëgn dit la „picera Aunejia“, ciodiche ara é plëna de pici punc sura l‘ega.

L‘iade da gní zoruch é sté lunch, mo i ân tröp da se cunté, tröpes fotografies da se mostré, y les beles esperiënzes da se baraté fora y n pü‘da palsé. Deache passé fora por set stac europeics (Talia, Austria, Germania, Olanda, Belgio, Luxemburg y Francia) te cinch dis y cinch nöts é pa ince da stancé. Chësc iade d‘istruziun é sté na beliscima ocajiun da odëi na pert dl‘Europa y da vijité posć nüs, mo ince da imparé da conësce jënt nöia y da se moscedé ite impara.

I rengraziun de cör la professuria Tasser Paola por l‘organisaziun y i professurs Carlo Suani y Barbara Tavella por nes avëi acompagné tratan chësc bel iade.

Dilan ince ala Uniun Europeica por le finanziamënt de chësc iade.