Ince iö á frecuenté les Scores Altes a La Ila.

I se l’un cuntada cun Elena Frenademetz de Badia – ex scolara dl lizeum linguistich

Ciüna dles trëi scores aste pa frecuenté? Ciodí pa?

I á frecuenté le Lizeum Linguistich. Canche iö á chirí fora ci scora frecuenté, ne esistîl nia ciamó trëi scores altes a La Ila, mo döes: l'ITC, sciöche al â inom dan da n per d'agn, y le Lizeum Linguistich. I á chirí fora le lizeum ciodí che i á tres albü ligrëza cun i lingac, al me sá bel da lí, scrí y comuniché, y i á dagnora albü interes por les materies umanistiches. Implü êi y sun dötaurela afascinada dai lingac foresć sciöche l'inglesc y le franzesc.

Ci mioresseste pa tö te chësta scora?

Al foss bel da fá ciamó deplü barac de studënc cun studënc de d'atres scores, sce poscibl ince cun studënc che vëgn da plü da dalunc, sides por conësce jënt nöia, co ince por podëi adoré i lingac impará a scora tla comunicaziun da vigni de.

Ciügn é pa i aspec positifs y i aspec negatifs dla scora alta a La Ila?

Ci che me á dagnëra plajü dles scores altes a La Ila é che, dal momënt che ara se trata de piceres scores, vëgnel veramënter ciaré de vignun, i professurs pó se conzentré dër tröp sön i scolars y i daidé a na manira che ne é nia poscibla te scores plü granes. Implü i dá la scora tröp sostëgn a sportifs o a studënc che fej d'atres ativités y é porchël gonot demez, a na manira che chisc studënc pois svilupé sü talënc zënza messëi renunzié ala scora. N aspet negatif de chël che al vëgn vignitant baié, é che i studënc sá n pü' manco bun le todësch co chi che vá a scora, por ejëmpl, fora en Puster. I arati che chësc fat sides ma en pert vëi y che chësc sides n aspet dër sogetif: sambëgn él plü saurí da imparé n lingaz sce an é tröp en contat para; dl ater vers depëndel ince tröp da d'atri faturs, sciöche por ejëmpl dai insegnanc y dal interes dl scolare instës por le lingaz. Ara vá zënz'ater ince da arjunje n bun livel de todësch tles scores altes da La Ila.

Ci pënseste pa dl’“alternanza scuola-lavoro”? Ci esperiënzes aste pa albü cun le practicum che te as fat a scora?

L'"aternanza scuola-lavoro" me á dër plajü. I á albü la fortüna da podëi fá n practicum te na scora elementara: chësta esperiënza me á daidé da capí sce al ess podü me savëi bel da insigné y me á spo ince daidé chirí fora mi tru do l'ejam de stat. Al é bel da podëi fá deplü practicums che döra poscibilmënter ince plü dî, por podëi i rové plü saurí pormez al monn dl laur y por che i studënc pois capí ci che al ti savess bel da fá sciöche laur tl dagní.

Ciügn é pa i plü bi recorc che te as dla scora alta?

Un di bi recorc é por ejëmpl le iade a Bournemouth tl’Inghiltera a imparé inglesc, che i un fat nos dl lizeum adöm a nüsc cumpagns dl ITC/ITE; lassö sunse jüs a scora y i un fat de vigne sort de ativités. A dormí sunse stá pro families locales y i sun ince jüs a Londra n de. N ater bel recort é le bal de maturité che nosta classa â organisé sö Calfosch; l'organisaziun se á dé n gran laur, mo se á ince porté na gran sodesfaziun: al é sté na beliscima sëra. Ion me recordi ince de ores de scora originales, o ince de chëres olache i un traté argomënc y informaziuns particolarmënter interessanc/interessantes, sciöche ince de deplü proiec che i un fat, sides ma nos sciöche classa, co ince cun d'atri studënc.

Ciüna é pa stada por te la plü bela esperiënza tratan tü 5 agn de scora?

La plü bela esperiënza che i á fat tratan mi 5 agn de scora a La Ila é zënzater sté podëi porté dant le teater "Edipo Re" de Sofocle, che i un imparé ite cun döta la classa. Al é sté n bel obietif por düc, olache düc se á dé da fá y se á porvé. I ne un nia ma porté dant le teater a La Ila, mo ince tla Sizilia, olache i un incunté scolars da deplü pertes dla Talia: al é sté n'esperiënza unica. I vëighi cun gran plajëi che le teater ne é nia jü a perde tles scores altes da La Ila, mo che al vëgn tres indô porté dant rapresentaziuns teatrales, y che le teater vëgn tut sö te na maniera positiva da studënc y professurs. :)

Ci aste pa fat do che te as stlüt jö la scora alta?

Do che i á stlüt jö la scora alta sunsi piada ia a studié a Desproch, olache i stüdi dötaurela inglesc y franzesc por jí a insigné.

Te á la scora arjigné ca bun al monn dl laur/université?

Dal momënt che i sun jüda a studié döes materies zentrales por le lizeum linguistich, i dui lingac

Ciun arateste pa che sides le plü gran vantaje da frecuenté la scora alta a La Ila?

Sciöche bel'dit, é l'ambiënt familiar dla scora dër n gran vantaje por i studënc. Por tröc é la scora dër dlungia a ciasa, chël ó dí ne messëi nia se sposté dër lunc y ne messëi nia pié ia la domënia sëra o dër adora da doman vigni de. Implü arati che i studënc ciafes na bona basa y na bona cultura generala te dötes trëi les scores, sciöche ince de bunes competënzes te tröc lingac. Ci che me plej personalmënter é che i scolars á ince döes ores de ladin a scora; i arati che al sides dër important por n pice grup linguistich sciöche le nost porté inant le lingaz y la cultura ladina ince te scora.

Ti aconsiasseste tö a n möt de terza mesana nosta scora?

Zënzater. Sambëgn ne él sö La Ila nia da ciafé dötes les sorts de scora, mo i arati che por ester la scora de na picera valada sciöche la nosta, pita la scora da La Ila tröpes poscibilités ai studënc: sides i lingac co la pedagogia co les materies economiches é damaná sön le marcé dl laur; an pó dí che les scores altes da La Ila deura tröpes portes sides ai studënc che ó jí a studié, co ince a chi che ó jí a lauré do l'ejam de stat.